merrion street

D'fhógair an tAire Ealaíon, Oidhreachta, Gnóthaí Réigiúnacha, Tuaithe agus Gaeltachta, Heather Humphreys T.D., sonraí inniu (Dé Céadaoin) maidir le céim nua den tionscnamh REDZ le forbairt eacnamaíoch i mbailte tuaithe agus sna ceantair máguaird a spreagadh.

Cuirfear €5 mhilliún san iomlán ar fáil faoi thionscnamh na gCriosanna Forbartha Geilleagraí Tuaithe (REDZ) 2016, ag tógáil ar an rath a bhí ar thionscnamh píolótach in 2015 faoinar cuireadh €3.8 milliún ar fáil do thionscadail ar fud na hÉireann.

Agus í ag seoladh céim nua na Scéime ag an gComórtas Náisiúnta Treabhdóireachta, dúirt an tAire Humphreys:
“Agus an eacnamaíocht ag teacht chuici féin arís, tá an Rialtas meáite ar a chinntiú go n-aireofar na buntáistí atá ag teacht leis an mbiseach seo i ngach pobal ar fud na hÉireann. Má táimid chun tacaíocht a thabhairt do na daoine atá ag iarraidh bheith ag maireachtáil agus ag obair faoin tuath in Éirinn, ní mór dúinn teacht i dtír ar an gcaipiteal daonna agus nádúrtha atá ar fáil i mbailte tuaithe agus sna ceantair máguaird le gur féidir linn deiseanna eacnamaíocha a chruthú agus tacú le cruthú post.

“Tacaíonn cur chuige REDZ le naisc níos fearr idir bailte tuaithe agus na ceantair atá timpeall orthu chun deiseanna eacnamaíochta a chruthú ag leibhéal áitiúil. Cuideoidh an scéim chun poist a chruthú agus a choinneáil i gceantair tuaithe in Éirinn. Ag tógáil ar an tionscnamh píolótach a seoladh in 2015, táim ag cur €5 mhilliún breise ar fáil i mbliana do thionscadail REDZ. Tá an leibhéal maoinithe a bheidh ar fáil méadaithe agam, go háirithe chun mórthionscadail uaillmhianacha a spreagadh agus, dá réir, cuideofar le forbairt inbhuanaithe eacnamaíochta agus cruthú fostaíochta i gceantair tuaithe.

“Táim ag gríosú Údaráis Áitiúla chun oibriú le pobail áitiúla, leis an earnáil ghnó agus le comhlachtaí eile Stáit chun na ceantair leis na riachtanais eacnamaíochta is mó a shainaithint - na ceantair sin ar féidir leo úsáid níos fearr a bhaint as a gcuid sócmhainní áitiúla chun gníomhaíocht eacnamaíoch a chruthú. Baineann sé seo ar fad le pobail áitiúla a chumasú chun deiseanna áitiúla a chur ar fáil do dhaoine áitiúla. Faoi scéim 2016, ceadófar tionscadal amháin REDZ ar a laghad do gach contae sa tír.

“Cuirfidh an scéim leis an Scéim €10 milliún Athnuachana Bailte agus Sráidbhailte a sheol mé i mí Lúnasa. Cinnteoidh an dá scéim go mbeidh lárionaid láidre eacnamaíocha agus sóisialta ag ceantair tuaithe a thacóidh, dá réir, le caighdeán maireachtála níos airde dóibh siúd atá ina gcónaí i mbailte tuaithe agus sna ceantair máguaird anois agus sa todhchaí.”

Cuirfidh scéim REDZ 2016 tacaíocht airgeadais suas le 80% ar fáil do na tionscadail bheartaithe agus tiocfaidh an fuílleach ó fhoinsí eile (e.g. Údaráis Áitiúla, páirtithe gnó nó maoiniú pobalbhunaithe).