merrion street

Chuir Donnchadh Mac Fhionnlaoich T.D. an tAire Stáit ag an Roinn Ealaíon, Oidhreachta agus Gaeltachta, fáilte roimh thorthaí na bliana 2013 a d’fhoilsigh Údarás na Gaeltachta inniu, 21 Eanáir 2014.

Dúirt an tAire Stáit gur ábhar sásaimh é gur éirigh leis an Údarás 616 post a chruthú in 2013, ag tógáil san áireamh an aeráid dúshlánach eacnamaíoch atá ann faoi láthair. Is údar dóchais é fosta, a dúirt an tAire Stáit, gur ceadaíodh tograí i gcaitheamh na bliana a ghinfidh fostaíocht mheasta de 560 post amach anseo. “Cuirim fáilte roimh thorthaí an athbhreithnithe seo a léiríonn go raibh an líon ba lú caillteanais post le tríocha bliain i gcliant chomhlachtaí Gaeltachta le linn 2013 agus a leiríonn fosta an obair fhiúntach atá ar siúl ag Údarás na Gaeltachta chun bonn seasmhach a choimeád faoin fhostaíocht sa Ghaeltacht”, a dúirt an tAire Stáit. Thagair an tAire Stáit fosta don laghdú leanúnach atá ar an ráta caillteanais post le roinnt blianta anuas. “Is cinnte gur léiriú dearfach eile é seo ar an dóigh a bhfuil comhlachtaí Gaeltachta tar éis a mbonn fostaíochta a bhuanú le blianta anuas agus iad in ann díriú anois ar bhorradh a chur faoina bhfiontair agus an eacnamaíocht ar tí a theacht chuici féin.