merrion street

Inniu, d’fhógair an tAire Cultúir, Oidhreachta agus Gaeltachta, Josepha Madigan TD, go mbeidh tréimhse ama bhreise d’aon mhí amháin ceadaithe don phobal agus do ghrúpaí oidhreachta pobail chun a gcuid tuairimí a nochtadh maidir le hOidhreacht Éireann 2030 – an plean nua náisiúnta d’Oidhreacht na hÉireann.

Tá suim ollmhór tar éis a bheith tarraingthe ar an gcomhairliúchán poiblí, a ndearna an tAire é a sheoladh ar an 1 Samhain 2018, agus breis is 70 ócáid chomhairliúcháin curtha ar siúl timpeall na tíre go dtí seo agus breis is 400 aighneacht faighte maidir leis go dtí seo. Agus í ag caint inniu, dúirt an tAire Madigan:

“Ba mhian liom aitheantas a thabhairt do na grúpaí pobail agus do na heagraíochtaí pobail go léir siúd, go háirithe do Líonra d’Oifigí Oidhreachta agus don Chomhairle Oidhreachta, atá tar éis páirt ghníomhach a glacadh agus an iliomad ócáidí eagraithe timpeall na tíre. Tá breis is 74 ócáid tar éis a bheith ann go dtí seo a rabhthas in ann freastal orthu, agus níos mó dóibh á n-eagrú an t-am go léir. Ar mhaithe leis an deis chun cur leis a thabhairt don oiread daoine is gur féidir, táim tar éis éisteacht le hOifigigh Oidhreachta agus le grúpaí eile a bhfuil níos mó ama iarrtha acu. Dá réir sin, táimse tar éis teacht ar an gcinneadh an spriocdháta le haghaidh aighneachtaí a shíneadh amach go dtí an 31 Márta 2019.”

Níl i gceist leis na hócáidí seo ach ceann amháin de na ceithre bhealach éagsúla ina bhfuil daoine in ann páirt a ghlacadh sa chomhairliúchán. Anuas air sin, gríosaítear iad chun:

- dul go dtí an chuid de shuíomh gréasáin na Roinne faoi Oidhreacht Éireann 2030 agus an suirbhé ar líne a líonadh https://www.chg.gov.ie/heritage/heritageireland2030

- aighneacht a chur isteach i scríbhinn, sa phost, chuig Oidhreacht Éireann 2030, An Roinn Cultúir, Oidhreachta agus Gaeltachta, Teach an Chustaim, Baile Átha Cliath 1. 

- nó aighneacht a chur isteach trí ríomhphost chuig HeritageIreland2030@chg.gov.ie

Chun teacht ar thuilleadh eolais faoi ócáidí poiblí de chuid Oidhreacht Éireann 2030, ba cheart duit dul i dteagmháil leis an Oifigeach Oidhreachta i do cheantar údaráis áitiúil féin. Tá liosta d’Oifigí Oidhreachta ar fáil ó shuíomh gréasáin na Comhairle Oidhreachta www.heritagecouncil.ie.