merrion street

Dé hAoine, 16 Bealtaine—Beidh Donnchadh Mac Fhionnlaoich T.D., an tAire Stáit sa Roinn Ealaíon, Oidhreachta agus Gaeltachta, i gContae na Gaillimhe inniu le freastal ar roinnt imeachtaí sa chathair agus i gConamara.

Tosóidh an tAire Stáit ar 11.30am i Leitir Mealláin, mar a bhfuil an tIonad Oidhreachta a bhí i gCaladh Ghólaim le hathlonnú go dtí an t- ionad nua ag Comhar Choigéil. Déanfaidh an tAire Stáit an t-ionad a oscailt go hoifigiúil agus tabharfaidh sé cuairt ansin ar thrá Leitir Mealláin chun bád le John Bhaba Jeaic Ó Confhaola a leáinseáil.

San iarnóin (5pm) beidh an tAire Stáit i Seanscoil na Mine in Indreabhán le teastais i gcleachtais ceardaíochta de chuid Pastime Chonamara a bhronnadh.

Sa tráthnóna (7.30pm) beidh an tAire Stáit ag bronnadh Buaic-Ghradam Cumarsáide an Oireachtais ag Gradaim Chumarsáide an Oireachtais in Óstán Chuan na Gaillimhe, Bóthar na Trá. Is chun aitheantas a thabhairt do shárchaighdeáin in earnáil na cumarsáide Gaeilge, idir aisteoireacht, iriseoireacht, craoltóireacht is uile, a bhronntar na gradaim seo.

Ag labhairt roimh an gcuairt, dúirt an tAire Stáit, “Cuireann sé áthas orm cuireadh a fháil an gradam seo a bhronnadh anocht. Tá cáilíocht agus caighdeán na n-iomaitheoirí ag dul i bhfeabhas ó bhliain go bliain, ar aon dul leis an saothar a chuireann siad ar fáil.”