merrion street

Dúirt an tAire Stáit do Ghnóthaí Gaeltachta, Donnchadh Mac Fhionnlaoich T.D. go bhfuil am dúshlánach roimh phobail Ghaeltachta agus é ag caint ag oscailt oifigiúil Éigse Uladh i nGaoth Dobhair, Co. Dhún na nGall inniu (9 Márta 2012).

Ag tagairt don Bhille Gaeltachta 2012 atá á dhréachtú faoi láthair, dúirt an tAire Stáit Mac Fhionnlaoich go dtabharfaidh an reachtaíocht seo sainmhíniú nua don Ghaeltacht a bheidh bunaithe feasta ar chritéir theangeolaíocha seachas ar chritéir thíreolaíocha mar atá faoi láthair. Dúirt an tAire Stáit go mbeidh deis ag na pobail Ghaeltachta an lámh a bheith acu ar an stiúir maidir le pleananna teanga a ullmhú dá gceantair féin agus go mbeidh rannpháirtíocht agus comhoibriú ón bpobal agus ó eagraíochtaí pobail ríthábhachtach don phróiseas seo.

"Is am dúshlánach a bheidh ann do phobail Ghaeltachta ach tá mé cinnte, leis an fhís agus an fhuinneamh a fheicimse agus mé ag dul thart go dtí na ceantair Ghaeltachta, go bhfuil siad réidh don dúshlán sin," a dúirt an tAire Stáit.

Thréaslaigh an tAire Stáit leis an gcoiste áitiúil as éigse den scoth a eagrú agus dúirt sé go raibh lúcháir air an deis a fháil léargas a thabhairt ar na gníomhaíochtaí éagsúla atá ar bun ag a Roinn chun cuidiú le buanú agus le neartú na Gaeilge i gcomhthéacs na Straitéise 20 Bliain don Ghaeilge.