merrion street

Chuir an tAire Stáit, Donnchadh Mac Fhionnlaoich T.D., fáilte roimh na staitisticí ar chainteoirí Gaeilge a foilsíodh inniu (29 Márta 2012) mar chuid de thorthaí Dhaonáirimh 2011.

Léiríonn na staitisticí go raibh 1.77 milliún duine in aois 3 bliana agus níos mó ábalta Gaeilge a labhairt sa bhliain 2011 i gcomparáid le 1.66 milliún duine sa bhliain 2006 agus gur tháinig méadú 7.1% idir 2006 agus 2011 ar líon iomlán na ndaoine a dúirt go raibh siad ábalta Gaeilge a labhairt.

"Tá mé sásta go bhfuil méadú tagtha ar líon na ndaoine a dúirt go bhfuil siad ábalta Gaeilge a labhairt. Is forbairt dhearfach í seo maidir le dul chun cinn a dhéanamh i dtreo na spriocanna atá sonraithe sa Straitéis 20 Bliain don Ghaeilge 2010-2030," a dúirt an tAire Stáit Mac Fhionnlaoich.

Maidir le ceantair Ghaeltachta, léiríonn na staitisticí gur tháinig méadú 5.2% ar dhaonra iomlán na Gaeltachta ó 91,862 sa bhliain 2006 go 96,628 sa bhliain 2011. Cé gur tháinig laghdú 2.3% ar líon iomlán na gcainteoirí Gaeilge i gceantair Ghaeltachta idir 2006 agus 2011, tháinig méadú 2.9% ar líon na gcainteoirí laethúla Gaeilge i gceantair Ghaeltachta ó 2006.

"Is dea-scéal é an méadú atá tagtha ar líon na gcainteoirí laethúla Gaeilge i gceantair Ghaeltachta, ach go háirithe ós rud é go bhfuil an sprioc de 25% le baint amach sa réimse seo thar shaolré na Straitéise," a dúirt an tAire Stáit Mac Fhionnlaoich. 

Nóta d'eagarthóirí:

Áirítear na spriocanna seo a leanas sa Straitéis 20 Bliain don Ghaeilge 2010-2030:

· an líon daoine a labhraíonn Gaeilge gach lá lasmuigh den chóras oideachais a ardú go 250,000 duine agus

· an líon daoine a labhraíonn Gaeilge sa Ghaeltacht gach lá a ardú faoi 25%.

CRÍOCH