merrion street

Tá sé fógartha ag an Aire Ealaíon, Oidhreachta, Gnóthaí Réigiúnacha, Tuaithe agus Gaeltachta, Heather Humphreys, inniu (Dé Máirt) go mbeidh gníomhaíochtaí áirithe eachaí incháilithe anois le haghaidh maoiniú a fháil faoi chlár reatha LEADER. Tá sé beartaithe ag an Aire leasú a dhéanamh ar liosta na ngníomhaíochtaí incháilithe faoi Chlár 2014-2020 LEADER, a d'fhéadfadh dul chun tairbhe do raon leathan gníomhaíochtaí eachaí agus tionscadail turasóireachta tuaithe, amhail ionaid eachaíochta agus scoileanna marcaíochta.

Ag labhairt di inniu, dúirt an tAire Humphreys:
“Measadh nach raibh na tionscail rásaíochta capall agus eachspóirt incháilithe faoi chlár 2007-2013 LEADER. É sin ráite, bhí tacaíocht do ghníomhaíochtaí coimhdeacha ar mhaithe le seribhísí a sholáthar incháilithe i gcás ina raibh sé sin ag teacht leis na Straitéisí Forbartha Áitiúil a bhí ceaptha i ngach limistéar. Áiríodh ar na gníomhaíochtaí sin raon leathan gníomhartha, ar nós tionscadail a bhain le hionad eachaíochta agus scoileanna marcaíochta.

“I bhfianaise an leibhéal suntasach infheistíochta i ngníomhaíochtaí coimhdeacha cheana, rinneadh an cinneadh nach mbeidh tacaíocht do ghníomhaíochtaí den sórt sin incháilithe faoi chlár 2014-2020 LEADER.

“Aistríodh Clár LEADER go dtí mo Roinnse i Mí an Mheithimh seo caite agus sheol mé Clár nua LEADER i mí Iúil 2016. Ó shin i leith, rinne mé machnamh ar an gceist seo agus is léir dom go bhfuil éileamh faoi leith ann go fóill ar thuilleadh infheistíochta i ngníomhaíochtaí coimhdeacha, go háirithe áit a gcuireann sé leis an turasóireacht tuaithe.

“Dá bhrí sin, tá sé i gceist agam leasú a dhéanamh ar liosta na ngníomhaíochtaí incháilithe chun maoiniú do ghníomhaíochtaí coimhdeacha an tionscail eachaí a cheadú. Beidh sé seo á dhéanamh ar bhonn spriocdhírithe, le béim faoi leith ar chinnte a dhéanamh go mbeidh rochtain ag an bpobal mór ar an infreastruchtúr atá ag fáil tacaíochta.”