merrion street

Tá sé fógartha ag an Aire Ealaíon, Oidhreachta, Gnóthaí Réigiúnacha, Tuaithe agus Gaeltachta, Heather Humphreys TD, inniu (Dé Luain) go bhfuil €1.1 milliún breise de chistiú ceadaithe aici do Bhord Scannán na hÉireann. Tá an cistiú deireadh bliana á chur ar fáil as Buiséad 2016 na Roinne.

Ag labhairt di inniu dúirt an tAire Humphreys:
“Tá áthas orm bheith in ann an cistiú breise seo a cheadú do Bhord Scannán na hÉireann, lena mbeidh siad in ann tuilleadh tacaíochta a thabhairt do scannánóirí na hÉireann. Fágfaidh sé sin go mbeidh €15.5 milliún san iomlán á chur ar fáil do Bhord Scannán na hÉireann ag an Roinn i mbliana.

“Faightear torthaí thar cionn as infheistíocht i mBord Scannán na hÉireann. An tseachtain seo caite, ainmníodh dhá scannán a bhí maoinithe ag Bord Scannán na hÉireann do na Golden Globes. Tá sé tábhachtach go ndéanfar infheistíocht leanúnach i scannánóirí Éireannacha más mian linn go leanfar ar aghaidh ag cothú daoine cumasacha agus ag cur amach léiriúcháin den chéad scoth.

“Tá an Rialtas tiomantas do thacaíocht a thabhairt d’earnáil scannán na hÉireann. Le déanaí, rinne mé anailís eacnamaíoch a choimisiúnú ar na tionscail scáileánbhunaithe, rud a thabharfaidh léiriú níos soiléire dúinn ar scála agus tionchar earnáil chlosamhairc na hÉireann. Tá an tionscal scannánaíochta ina cholún tábhachtach freisin de chlár Éire Ildánach an Rialtais, a bhfuil sé mar aidhm leis lárionad barr feabhais a dhéanamh d’Éirinn ó thaobh léiriú meán ar fud an domhain de.

“De réir mar a thagann feabhas ar an ngeilleagar, tá súil agam go mbeidh muid in ann infheistíocht agus tacaíocht a mhéadú d’earnáil bheoga scannán, teilifíse agus beochana na hÉireann.”